మేషం

అశ్విని: 1, 2, 3, 4 పాదాలు, భరణి: 1, 2, 3, 4 పాదాలు, కృత్తిక 1వ పాదం.
పేరులో మొదటి అక్షరాలు: చూ, చే, చో, లా, లీ, లూ, లే, లో, ఆ.
ఆదాయం 4, వ్యయం 14, రాజపూజ్యం 5, అవమానం 7.

ఈ సంవత్సరం ప్రారంభంలో గురుగ్రహ ప్రభావం వల్ల కుటుంబం, వ్యక్తిగత జీవితం, ఆర్థిక విషయాల్లో కొంత అనుకూలత కనిపిస్తుంది. మే 14 వరకు గురు అనుకూల స్థానంలో ఉండడం వల్ల కొత్త అవకాశాలు, ఆదాయ వృద్ధి, కుటుంబంలో శుభకార్యాల సూచనలు ఉంటాయి. మే 18 వరకు రాహు ప్రభావం కారణంగా కొన్ని అనుకోని మార్పులు, నిర్ణయాల్లో జాగ్రత్త అవసరం. ఆ తర్వాత పరిస్థితులు క్రమంగా మెరుగుపడే అవకాశం ఉంది. ఉద్యోగస్తులకు కష్టానికి తగిన గుర్తింపు లభించే అవకాశం ఉంది. పదోన్నతి లేదా బాధ్యతలు పెరగవచ్చు. వ్యాపారస్తులు కొత్త పెట్టుబడులు పెట్టే ముందు ఆలోచించి నిర్ణయం తీసుకోవడం మంచిది. భాగస్వామ్య వ్యాపారాల్లో జాగ్రత్త అవసరం. విద్యార్థులకు శ్రమకు తగిన ఫలితాలు వస్తాయి. పోటీ పరీక్షలకు సిద్ధమయ్యేవారికి అనుకూల సమయం. కుటుంబంలో కొన్నిసార్లు అభిప్రాయ భేదాలు వచ్చినా, పరస్పర అవగాహనతో పరిష్కరించుకోవచ్చు. ఆరోగ్య పరంగా చిన్నచిన్న సమస్యలు రావచ్చు. ఆహార నియమాలు పాటించడం, విశ్రాంతి తీసుకోవడం మంచిది. ఖర్చులు పెరిగే అవకాశం ఉన్నప్పటికీ, సరైన ప్రణాళికతో ఆర్థిక పరిస్థితిని సమతుల్యం చేసుకోవచ్చు. సంవత్సరం ద్వితీయార్థంలో శుభఫలితాలు క్రమంగా పెరిగి, ముఖ్యమైన పనులు పూర్తయ్యే అవకాశం ఉంటుంది. రైతులకు సుమారుగా రెండు పంటలు కలిసి వచ్చును.

ఈ రాశివారికి తొమ్మిది అదృష్ట సంఖ్య. 1, 2, 3, 6 తేదీలతో కూడిన ఆదివారం, గురువారం శుక్రవారాలు కలిసి వచ్చును. మనశ్శాంతికై నిత్యము శనికి తైలాభిషేకం, నల–దమయంతి చరిత్ర పారాయణ చేయుట, ప్రతి మాస శివరాత్రికి అంటే శని త్రయోదశులల్లో తైలాభిషేకం చేయుట శ్రేయస్కరం.